(( 1 ))
قلتها وقتها
لو طلبتيها هقول لأ
معادش ينفع
لان اللي انكسر
صعب يتصلح
صحيح لسة جوايا زي ما انتي
وصحيح ذكراكي معيشاني
وصحيح انتي أحلى حب عشته
لكن معادش ينفع
الخلافات خلت أي حاجة حلوة تستخبى
تاه حبنا وسط المشاكل
مكرهتكيش ولا اتغيرت نظرتي ليكي
لسة بحبك زي الأول
لسة عشقي ليكي ملهوش حدود
بس ازاي نرجع ؟
صدقيني
معادش ينفع
.........................................
جرحي اللي محسيتوش
من كتر ما حسيته
ألمي اللي منطقتهوش
ولا ف يوم شكيته
دمعي اللي مذرفتهوش
ولا ف ليلي بكيته
حبي ليك منسيتوش
وقلبي بيه لسة دايب
ذكراك جوايا عايشة
معايا وانت غايب
ملامحي جامدة ملهاش ملامح
قلبي ملكك .. لكن مش عايز يصالح
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
(( 2 ))
ولما جت المفاجأة وفعلا طلبتيها
حنيت
بس معرفتش أرد
خفت
قلبي بيحبك ومش قادر يرفض
لكن برده مش عايز يرجع
احترت
واحتار عقلي معايا
.........................................
قلبي جوايا لكنه معاكي
روحي فيا لكن عشقاكي
مشاعري ليكي لكن رفضاكي
.......................
خايفة أرجع
مش قادرة أمنع
إحساسي من حبك
ولا عقلي من رفضك
خايفة أقبل
خايفة أرفض
خايفة أحيي مشاعر
محكوم عليها بالإعدام
خايفة أقتل نبض قلب
مجروح .. لكن ولهان
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
(( 3 ))
من كتر حبي
لما جرحتي
منجرحتش
من كتر عشقي
لما دبحتي
مندبحتش
من كتر دمعي
لما بكّيتي
مدمعتش
من كتر خضوعي
لما سبتي
متمسكتش
من كتر شوقي
لما رجعتي
مشتقتش
من كتر خوفي
لما طلبتي
موافقتش
ولا رفضتش
كلام جميل جدي
ردحذفده منتهى التوهان اللى بتحكيه ده
ردحذفاصعب حاجة فى الدنيا المشاعر المتناقضة
اما تكونى عايزه ومش عايزه
قمة الحيرة والتعاسة
استاذ محمد عامر
ردحذفمرورك الاجمل :)
استاذ اسلام
ردحذففعلا توهان
يمكن علشان حبيت اوي
بس فعلا خايفة
ومحتارة
ومش عارفة اقرر
تحياتي لمرورك الطيب
كتير حلو
ردحذف