فاكرة لما كنا بنتكلم ف التليفون بالساعات
ونص المكالمة تكون ( ها ..... ) ونفضل ساكتين بس مش عايزين نقفل
ونحكي لبعض كل اللي حصل من ساعة ما سبنا بعض بالتفصيل ؟؟
فاكرة لما كان كل ما حد يشوفنا يقول لنا انتوا اخوات؟
ويقولوا ان فينا شبه كبير من بعض
واحنا نقول علشان قلوبنا مع بعض ؟؟
فاكرة لما كنا بنحلم مع بعض
ونقول حتى بعد ما نبقى امهات مش هنسيب بعض
وكنا بنتفق ان زوجي وزوجك وابني وابنك هيكونوا اصحاب زينا ؟؟
فاكرة لما قلتلك ان لو حد اتقدملي
هقول له احنا اتنين تاخدنا شروة على بعض ؟؟
فاكرة لما كنا ف اول كل اجازة نقعد مع بعض ونفضل نخطط للي هنعمله ف الاجازة ؟؟
فاكرة لما كنا مبنبطلش رغي
وكل ماحد يسكتنا نقول له احنا ما بنصدق نتقابل ؟؟
فاكرة لما كنتي بتقوليلي اني انا اجابة دعوة كنتي دعيتيها لربنا ؟؟
فاكرة لما كنا بنتفق نصلي الضحى ف نفس الوقت
وندعي لبعض واحنا ساجدين ؟؟
فاكرة لما كنا نتقابل
واول ما نسيب بعض نروح نفتح الياهو ونقعد نتكلم ؟؟
فاكرة لما كنت كل يوم بالليل واحنا بنتكلم ع النت اكون مهيسة
وافضل اقول كلام عجيب وانتي تنزلي الصفحة وتفضلي تعملي حاجات تانية لحد ما أخلص تهييس ؟؟
فاكرة لما كنا كل ما نختلف ف اي موضوع
منسيبش بعض غير لما نقول الشيطان عايز يوقع بيننا
واحنا مهما اختلفنا ف الرأي هنفضل زي ما احنا
وعمر ما الشيطان هيقدر يفرقنا ؟؟
فاكرة الشجرة اللي كنا بنقف تحتها ونفضل نتكلم
وسميناها " شجرة الملتقى "
وبقت اعز مكان لينا ؟؟
فاكرة لما كان كل حد يشوفنا حتى لو اول مرة وحتى لو ع النت
يحسدنا على صداقتنا ويقول نفسي يكون ليا حد صاحبي كده ؟؟
فاكرة لما سافرنا مع بعض اول مرة وكنتي فرحانة اوي
وواحنا ماشيين قلتيلي " جزاكِ الله خيراً .. أسعدتيني كثيراً .. أسعدكِ الله في الدنيا والآخرة " ؟؟
فاكرة لما كانت واحدة فينا بتقل ايمانيا التانية تاخد بإيدها وترجعها لربنا ؟؟
فاكرة لما كنا بنعيط واحنا بنتكلم ع النت علشان وحشنا بعض ؟؟
فاكرة كنا مستغربين احنا ازاي قربنا من بعض اوي كده في الفترة الصغيرة دي ؟؟
فاكرة لما بنفضل نبص لبعض واحنا مبتسمين من غير ما نتكلم ؟؟
فاكرة لما كنتي تتسألي مين اقرب حد ليكي في الدنيا
تقولي اسمي حتى لو الناس دول ميعرفوش مين دي ؟؟
فاكرة لما كنا بنقول
" لن يفرقنا إلا الموت .. ولن يوقفنا إلا القدر " ؟؟
فاكرة لما كتبتيلي ف الكشكول بتاعي " يا أنا " ؟؟
لسة محتفظة بالورقة دي لحد دلوقتي
فاكرة نوتة التليفونات دي ؟؟
قلتيلي انك لقيتيها فجبتيهالي علشان اللي مكتوب عليها ده
فاكرة التقويم ده ؟؟
برده جبتيهولي علشان اللي مكتوب عليه
فاكرة الميدالية دي ؟؟
فاكرة المنديل ده ؟؟
كنتي ادتيهولي واحنا ف مطعم مرة
بس انا فضلت محتفظة بيه لحد دلوقتي !
انتي عارفة بقى اني مجنونة :)
فاكرة الوعد اللي وعدتيهولي ف اليوم ده ؟؟
انا كتبت الوعد ف ورقة النتيجة بتاعت نفس اليوم ولسة محتفظة بيها
وتخيلي
من يومين بشوف الورقة لقيت الحكمة اللي مكتوبة فيها من تحت ايه؟
" اختر الرفيق قبل الطريق " !
ــــــــــــــــــــــــــــــــــــــــــــــــــــــــــــــــــــــــــــــــــــــــــ
أنا بقى اخترت الرفيق .. بس مكملش معايا الطريق !!!
تعرفي اني كنت - ومازلت - في سجودي دايما بفتكرك ف الدعاء قبل نفسي ؟؟
تعرفي اني كنت - ومازلت - كل ما حد يتكلم عن الحب في الله عيني تدمع وافتكرك ؟؟
تعرفي اني كل ما افتح حاجة من حاجاتي القديمة الاقي بصمة ليكي ؟؟
كلمة انتي كتبتيهالي او تعليق او شعار
تعرفي اني بعد ما كل حاجة بيننا انتهت
جمعت كل حاجة منك ف صندوق وكتبت عليه من بره كده ؟
تعرفي اني كنت في فرح بنت عمتي من شهر تقريبا
وكتبتلك الورقة دي ؟؟
تعرفي اني لسة بحبك زي الاول بالظبط وعمري ما فكرت فيكي زي ما انتي فكرتي فيا ؟؟
تعرفي اني لما انتهى كل اللي بيننا منزلتش ولا دمعة ؟؟
حسيت اني من كتر ما انا زعلانة مفيش دموع قادرة تعبر عن ده
فضل حزني جوايا
تعرفي ان الحاجة الوحيدة اللي زعلتني
انك فهمتيني غلط وان صورتي عندك بقت اني ظلمتك ؟؟
تعرفي اني مع ده مزعلتش منك ولا حتى بطلت ادعيلك ؟؟
انا بس كان نفسي أفضل ع الاقل ذكرى حلوة عندك
تعرفي ان لما حد كان بيعرف اللي حصل ويفكر يغلط فيكي او يقول انك غلطانة
كنت بفضل ادافع عنك وبزعل اوي انه بيقول كده ؟؟
تعرفي اني كل ما كنت بفكر ف اللي حصل بطلع نفسي غلطانة علشان مش عايزة اشوفك غلطانة ؟؟
مع ان كل اللي كانوا جوا الموضوع قالوا انك ملكيش حق ف اللي عملتيه
تعرفي انك - ومع كل اللي حصل - احلى حاجة حصلتلي ؟؟
ــــــــــــــــــــــــــــــــــــــــــــــــــــــــــــــــــــــــــــــــــــــــــ
ملحوظة : كلامي مجرد فضفضة لكن مش معناه اني عايزة نرجع
لاني مقتنعة تماما انه مينفعش رجوع
وفعلا مش عايزة ارجع اصلا
ملحوظة تانية : رسايلك على فكرة دلوقتي بتتعبني اوي
وكلامك انك عايزانا نبقى عادي
بصي
اللي كانوا قريبين اوي صعب يبقوا عادي
صعب اتنين كانوا بيحبوا بعض اوي وبعدها يبقوا اصحاب وخلاص
ملحوظة تالتة : عارفة انك مش هتشوفي الكلام ده .. علشان كده أصلا انا بكتبه !
بس كده
خلص الكلام
!
انا بجد مبسوط انى اتكعبلت فى مدونتك دى و لاقيتها
ردحذفقلما بقابل ناس بتكتب اللى جواها من غير تلوين للمشاعر
بس خلاص :)
:)
ردحذفربنا يكرمك
ومبسوطة بجد ان المدونة عجبتك
تحياتي ليك
بس :)
علي فكرة كلامك ده يخلي الواحد يعيط , وهيا لوشافت الكلام ده اكيد مش حتقدر تبعد عنك تاني
ردحذفشكلكم اتحسدتوا
تحياتي
محمد عامر
:)
ردحذفالحقيقة انا زي ما قلت كتبت الكلام لاني عارفة انها مش هتشوفه
لاني مش عايزة اوصلهولها .. انا مجرد بطلع اللي جوايا
مش عايزاه يوصل لاني مش بستعطفها من الكلام علشان ترجع
وهي لو شافت الكلام ومقدرتش تبعد مش هينفع اصلا اننا نقرب ولا ده يحصل
اللي بينكسر صعب يتصلح
عموما خيير
وانا بدعيلها ان ربنا يرزقها الافضل مني
بشكر حضرتك :)
اه من كم الوجع اللي ف البوست ده :(
ردحذفمعلش لعله خير
:)
ردحذفاكيد خير بإذن الله
وانا عندي يقين ان ربنا هيعوضني ويعوضها ان شاء الله
رغم الوجع .. الا انك اسعدتيني بمرورك :)