خد قرارك

إنك تاخد القرار وتكون منه أكيد
ومهما حصل هتنفذه ده شيء أكيد
محتاج منك عزيمة وإرادة صبر واحتمال
محتاجك تكون شجاع تقول هعمل مش مجرد خيال
تختار الصح وتعمله مهما كان ف عيون الناس محال
ولا حد يوقفك ولا حاجة توقعك
تكون جامد شديد قوتك تهد جبال
اتكل على ربك ده هو الواحد المتعال
وهو حسبك عليه اتكالك ييسرلك الحال
ينور بصيرتك بنور الإيمان
ويهدي فؤادك يوصلك لبر الأمان
فكر واستشير .. ركز واستخير
وبهمة نفذ متستناش
ده شطانك هيحبطك ويثبطك
وبمشيك وراه الدنيا متحلاش
خد قرارك يلا أوام
واوعى تأجل ..
محدش عارف باقي من عمرك كام
اتقدم خطوة .. وربك هيقدمك مية قدام
خد قرارك .. خلي حياتك اختيارك
واوعى تقول مقدرشي ..
دي حياتك ملكك م البداية للختام

ــــــــــــــــــــــــــــــــــــــــــــــــــــــــــــــــــــــــــــــ

بتاريخ 9/11/2012

عن قرار خدته وهنفذه قريب بإذن الله

can't do it anymore



I feel that I don't feel anything

ف عيوني دمع مبينزلش

جوايا كلام لساه متقالش

ف قلبي مشاعر مبتطلعش

على شفايفي بسمة مبتضحكش

جوا مني حلم متحققش

فوق كتافي حمل مبيتشالش

روحي من زمان ماتت

وقلبي مصمم ميموتش

رفعت انا خلاص الراية

لكنه بيعافر مسلمش

ولا استسلمش

حكاية قلب

يحكى أن

قلبان تحابا

تعانقا

اختلفا

تنازعا

انشرخا

انفصلا

تحطما

....

اللّهُمّـ إِنّكَـ تَعْلَمـ

أَنّي مَا فَعَلْتُه

إِلّا لِأَجْلِكـ

فَعَوّضْنِي اللّهُمّـ خَيْراً

وَارْزُقْنِي بِفَضْلِكـ وَكَرَمِكـ يَا رَبّنَا

تعرف لما تكون ماشي ف طريق .. وطول ما انت ماشي .. كل شوية تقف .. تبص حوالك .. تسأل انا فين؟ .. تبص وراك .. مش عارف جيت ازاي .. بس شايف ملامح من مكانك اللي جيت منه .. تكمل مشي ف نفس الطريق .. وتقف .. تبص حواليك .. تسأل انا فين؟ .. تبص وراك .. تلاقي الملامح عماله تبهت والمعالم تختفي .. تكمل نفس الطريق .. تقف .. تبص حواليك .. تسأل انا فين؟ .. تبص وراك .. قدامك .. يمينك .. شمالك .. مش عارف انت جيت منين .. تقدر تقول دلوقتي انك تهت .. وتكمل الطريق .. تقف .. وتكمل .. وتقف .. وتكمل .. وتكمل .. وتكمل .. وتقف .. وتكمل .. وتكمل ..............................
وتفضل مكمل طريق طوييييييييييييييييييييل منتاش عارف هو ايه ولا ازاي ولا انت رايح فين ..
لحد ما فجأة ..
تلاقي نفسك وصلت لاخر الطريق .. تبص وراك .. طريق طويييييييييل متعرفش ازاي ولا امتى مشيت فيه .. ولا منين جيت .. تبص للمكان اللي وصلتله .. مش ده .. مش ده مكاني .. مش ده اللي كنت جايله .. لا .. مش هو ده .. معرفوش .. ازاي اصلا؟ .. امتى؟ .. هو ده حصل فعلا؟ .. حقيقي؟ .. لا .. مش ده .. انا فين؟ .. لا .. لا .. مش هو ده .. والله ما هو .. انا فين .. لا .. لا .............................


بقالي 3 سنين
3 سنين ماشية ف طريق
3 سنين ببعد عن طريق
3 سنين بقرب من طريق

3 سنين بتوه من نفسي .. او هي بتتوه مني
3 سنين ببعد عن نفسي خطوة بخطوة
وكل شوية اسأل انا مين .. فين انا الحقيقية؟ .. ابص ورايا اشوف ملامح منها لسة موجودة .. اطمن شوية .. واخاف شوية
اكمل زي ما انا .. وكل ما الوقت بيعدي .. كل ما بتتغلغل جوايا اكتر انا الغريبة عني .. وبتبعد اكتر انا بتاعتي
واكمل .. وكل ما يمر الوقت اكتر .. تختفي معالمي القديمة .. وتتأصل فيا معالمي الجديدة .. اللي بقت هي انا
وبعد 3 سنين
دلوقتي
لقيتني مش عرفاني
لقيتني بقيت حد غريب عني
حسيت كتير الفترة اللي فاتت اني معرفنيش
بس دلوقتي مختلف
نظرتي دلوقتي اختلفت عن النظرة الاولى
قبل كده كنت بستغرب الطريق اللي انا اصلا جواه
لكن دلوقتي ببص للطريق من اخره
بعد ما مشيته كله
النظرة دي مختلفة

نظرة بتقول دي مش انا
او بقت انا
بس مش دي
انا معرفهاش
حتى من جوا
انا اتغيرت اوي كده؟
لا
انا متغيرتش
انا اتبدلت
اتبدلت بكائن غريب سكن جوايا
معرفش معالمه
اصلا ملوش معالم
بقيت لا شيء بالمعنى الحرف للكلمة
مش الشيء السيء اللي كنت بشوفه وانا ف وسط الطريق
لا
انا دلوقتي لا شيء فعلا
علشان الكائن اللي جوايا ده خاوي
مفيش جواه حاجة
كله على بعضه عبارة عن شوية حاجات اسوأ من بعضها
مجوف
وجواه فاضي
علشان الفراغ يكمل السوء ده

مش عارفة ليه عيطت
بس عيطت لدرجة اني مكنتش عارفة اتنفس
عيطت لما اكتشفت او ادركت الوضع

مش عارفة الـ 3 سنين دول ازاي عدوا عليا وانا كده
او ازاي انا عديتهم وانا كده
مع اني وقفت اكتر من مرة
بس معرفش ليه كملت الطريق
وكأني استسلمتله
وكأنه كان بيشدني لقدام .. لحد ما اوصل اخره

هي دي انا؟
لو كده
يبقى انا بجد بكرهني
اصلا مش عايزة اعرفني علشان اكرهني
اصلا انا فعلا معرفنيش

اول مرة اقف قدام حالة مبقاش عارفة اقول لنفسي اني ممكن اتخطى ده او حتى اقول اني مش قادره اتخطاه بس عندي امل .. او اننا لازم نقع علشان نتعلم نقوم .. ولازم نمشي ف طريق غلط علشان نعرف الطريق الصح .. او ان كلنا بنغلط .. او حتى اني معرفنيش بس ف اعماقي لسة موجودة انا اللي اعرفها
لا
مش عارفة اقول ولا حاجة من الكلام ده
مش علشان مصدومة
ومش علشان مش عارفة اتكلم
ولا علشان انا جوه الموضوع فشيفاه بعين تانية
لا
الفكرة اني قعلا معرفنيش كليا
من جوا ومن برا
حتى اعماقي معرفهاش
مبقولش كل الكلام ده
علشان مش دي المرحلة بتاعت الكلام ده
المرحلة دي عديتها من زمان
انا دلوقتي ف المرحلة الاخيرة
بعد ما عديت كل المراحل
او بمعنى اصح في المرحلة اللي بعد الاخيرة
وبعد الاخير مفيش كلام
مبيتقالش اي كلام
علشان مبينفعش اي كلام
احنا بس بنبص لكل المراحل اللي عدينها او اللي عديتنا
وجوانا خمسميت الف صوت
بيسألوا مين دي؟ وازاي جت هنا؟
انا رحت فين ؟ مش المكان اللي رحته .. لكن (انا) راحت فين؟؟؟؟؟؟؟؟؟؟؟؟؟

( انا ) اختفت
( انا ) معادتش موجودة
( انا ) وكأنها كانت مجرد حلم صغير وكل اللي موجود دلوقتي هو الواقع وكان الواقع .. بس مينفعش يبقى "هيكون" ...

 أنـــــــــــــــــــــــــــــــــــــــــــــــــــــــــــــــــــــا   مــعـــــــــــــــــــرفـنـيــــــــــــــــــــــــــــــــــش

If u were here , every thing would be different

كل

يوم

بيكون

أصعب

من

اللي

قبله

.

انفجار

عايزة

افقد الذاكرة

مش عايزة

افتكر اي حاجة

مزعلاني او تعباني

كل حاجة

حلوة

بقت مجرد

ذكرى

تعبت

م الذكريات

تعبت

م الدموع

تعبت

م الاسئلة

تعبت

م العتاب

تعبت

م الانتظار

تعبت

من نفسي

تعبت

م البعاد

تعبت

م الفراق

تعبت

من كل البشر

بقيت بخاف

اقرب من حد

علشان مصيرنا ميكونش

الفراق

بقيت بخاف

اعاتب حد

علشان مكونش

باجي عليه

بقيت بخاف

افكر في حاجة

علشان مبقاش

بظلم الناس

بقيت بخاف

التمس اعذار

علشان مبقاش

بظلم نفسي

مبقتش عارفة

الحد اللي يوفرلي كل اللي محتاجاه

موجود ولا لا

هييجي ف يوم ولا لا

هييجي وقت

احس بدفا وامان؟

هييجي وقت

احس اني مش عايزة حاجة من الدنيا

علشان عندي اللي يغنيني عن كل الدنيا؟

هييجي وقت

اترمي ف حضن حد وافضل اعيط

وانسى ف حضنه كل حاجة تعباني؟

هييجي وقت

وحد يثبتلي اني صح مش غلط؟

واني من حقي اطلب الدفا من الناس؟

هييجي وقت

انام من غير ما اعيط؟

هييجي وقت

اعيش على واقع مش ذكريات؟

هييجي وقت

اضحك من قلبي؟

هييجي حد

يساعدني ف تحقيق احلامي؟

هقدر اصبر

لحد ما الاقي الحد ده؟

هقدر اصبر

لحد ما الاقي اللي يقف جنبي وقت ما احتاجله؟

هقدر اصبر

لحد ما الاقي اللي يحس بيا من غير ما اقول؟

هقدر اصبر

لحد ما الاقي اللي يحسسني اني اولوية ف حياته

مش زائدة على حياته؟

عايزة

اصرخ

باعلى

صوتي

عايزة

اعيط

واعيط

واعيط

بصوت عالي

عايزة

اقول

اااااااااااااااااااه

اسمع كل العالم

عايزة

بعد ما اعمل كل ده

اناااااااام

وانا مرتاحة

علشان

هبقى

طلعت

كل اللي جوايا

مش عايزة

ابطل

كلام

تعبت

من كتر

الكتمان

لو الكلام خلص

مشاعري

ودموعي

وجراحي

مبيخلصوش

وبس

جمود

لست حزينة

ولست أيضاً سعيدة

بل أنا في المرحلة الأصعب ...

لقد تجمدت مشاعري .. !

مكنتش اتوقع اني هتجرح مرة تانية
ومكنتش متوقعة اكتر ان لما الجرح هييجي .. هيكون منك انت
حتى لو متكلمناش
وحتى لو مسمعتكش ولا سمعت مبرراتك واعذارك
بس انت خلاص رتبت حياتك ونسيت تحطني فيها
يبقى خلاص .. انا قررت انسحب بهدوء من حياتك
عايزة افتح الموضوع واعاتبك واسمعك
بس مش هقدر استحمل كلامك المكرر اكتر من كده
مش عايزة اسمع منك انك بتحبني واني من اقرب الناس ليك و..و..و......
انا بس عايزة اعرف حاجة واحدة بس
انت فعلا بتحبني وانا فعلا افرق معاك؟
ولا حياتك الجديدة خلتك مش محتاجلي وبقيت انا مجرد صورة وسط صورك القديمة؟
ولا اصلا انا عادي بالنسبالك من الاول وانا اللي فهمت غلط؟

مش مستحملة بجد جرح فوق جرحي
وانت عارف كويس انا قد ايه مجروحة
وقد ايه لوحدي حتى وانت موجود
تخيل مع تجاهلك المستمر ليا ده بقيت عاملة ازاي؟

انا اصلا قررت خلاص اني ابعد
بس هتكلم معاك قبل ما اخد الخطوة دي وهعاتبك قبل ما امشي
مش علشان حاجة
غير اني مش عايزة اظلمك
عايزة اسمعك للاخر
مش عايزة احطك في الموقف اللي انا اتحطيت فيه قبل كده مع حد تاني

تعرف؟
انا كان عندي كلام كتير اوي كنت عايزة اقولهولك
وكلام اكتر كنت عايزاك تحسه او تقراه من عينيا
انت اصلا مبصيتش في عينيا ولا مرة من ساعة ما جيت .. تخيل؟؟
ولا سمعتني لما جيت اتكلم
ولا حسستني انك جيت اصلا
وهسألك نفس السؤال اللي سألتهولك لما جيت
هو انت اصلا جيت؟؟؟؟؟؟؟؟؟؟؟؟؟؟؟؟؟؟؟؟؟؟

مرعوبة اني اكلمك
انا بجد الجرح اللي فات خلاني اتهز من جوا جامد
ولحد دلوقتي حاجات كتير تاهت مني
او تهت انا من حتت كتير
لو اتجرحت تاني .. ولو منك
مش هعرف حاجة بعد كده
هتوه من نفسي
اكتر ما انا تايهة
علشان خاطري .. سيب الحتة السليمة الباقية مني زي ما هي
انا محتاجة ترميم مش تدمير

دموعي مبقتش تستوعب كم الالم اللي بفرض عليها تعبر عنه
هي اصلا لسة منزلتش من الجرح اللي فات
وجرحي لسة ما اتشفاش
هستحمل ازاي جرح جديد؟؟؟

مدينة قلبي محتاجة سكان جداد مش اللي فيها يهاجروا
مش كفاية كل اللي هاجروا؟

خايفة اني بعد كده اخاف اقرب من اي حد
علشان ميكونش مصيرنا في النهاية الفراق
واتوجع تاني
او تالت بقى

عايزة اشوفك دلوقتي حالا علشان اقول كل اللي جوايا واسمع كل اللي جواك
تعبت م الانتظار
مش كفاية كل الوقت اللي استنيته؟
عايزاك تيجي قبل ما ارجع في كلامي

بسأل نفسي هو ايه كان هيجرا لو كنا فضلنا مجرد اخوات وخلاص؟
وايه اصلا اللي حصل لما قربنا من بعض وبقينا اصحاب .. او اتوهمنا اننا اصحاب؟
هو كان لازم ده يحصل؟ مكتوبلي اني اتجرح تاني؟

هو انا من حقي الومك ولا انا اللي محتاجة حاجات مش من واجبك انك توفرهالي اصلا؟
انا اللي عايزاك تحبني بطريقة معينة ولا ده طبيعي؟
انا اللي علشان فقدت ناس كتير ومفتقدة ناس اكتر .. طالبتك بحاجات فوق طاقتك ؟
هو انت غلطان او مدتنيش اللي انا عايزاه ولا انا اللي غلطانة اني عايزة منك تعوضني عن كل حاجة؟
كتر التساؤلات دي هتقتلني بجد
مبقيتش عارفة اصلا انا صح ولا غلط
ولا ايه اللي حقي ومفروض اطالبك بيه وايه اللي مش من حقي او مش واجبك انك تعمله

انا تعبت اوي بجد
وانا اصلا تعبانة من غير ده
انت زودت تعبي بدل ما تخففه عني زي ما كان املي

اصعب حاجة في الدنيا .. انك تكون محتاج حاجات كتير ومستني من شخص معين انه يوفرهالك ..
وفي الاخر .. يكون هو اكتر حد يحرمك منها .. ويتخلى عنك وانت في اكتر الاوقات حاجة ليه

.

.

.

مات الكلام

لما صوتي بـ "سلمية" يتنبح

وأخويا جنب مني يندبح

وكرامتي ف كل مكان بتنجرح

يبقى خلاص .. خلص الكلام

لما يقولوا للثورة هما الحماة

ونلاقيهم وش تاني للطغاة

ومرة تانية يفقد الأب ضناه

يبقى اعذروني .. مات الكلام

لما العباسية من بعد الميدان

تشهد إني من تاني بتهان

يبقى صدقوني ..

اسحلوني .. اضربوني .. اسجنوني

اقتلوني .. ادبحوني

بس متنسوش تكتبوا على قبري

مات .. بس عمره ما كان جبان

الحمدلله

عايزة اقول كلام كتير بس مفيش كلام
تعبت من كل حاجة وتعبت م الكلام
مش عايزة اقول عايزة وعايزة .. ولا عايزة اقول تعبت ومش قادرة
لاني تعبت من التعب نفسه
او يمكن التعب هو اللي تعب مني !

جوايا حاجات كتير مبقتش قادرة استحملها
بس مش عايزة اتكلم ولا افضفض ولا اشكي
بتكسف حتى اقول لربنا اني عندي هم
لكن بقول للهم اني عندي رب

هو انا لو رغيت وشكيت واتكلمت ممكن ارتاح؟
انا اصلا مش بعرف اطلع اللي جوايا
مع اني بتكلم كتير وبتفلسف اكتر
بس مشاعري مش بعرف اقولها
ساعات بتكون دي ازمة
بس كمان مش لاقية اللي اقولهاله
مش علشان مفيش حد يسمع
لكن مش اي حد ينفع يسمع

حتى الحروف بتتوه مني لما بحتاجلها
مش عارفة حتى افضفض بالكتابة

هو انا هقدر اصبر اكتر من كده ؟؟؟؟
هو انا ممكن اوصل في يوم من الايام ولا هفضل تايهة وسط الطريق ؟؟؟؟

بقيت بحس ان كلمة تعبت تافهة اوي بالنسبة لكم الوجع اللي جوايا
مش عارفة اصلا اذا كان من حقي اقول تعبت ولا لأ !

هو انا ليه مش بيجرالي حاجة من كمية التعب اللي جوايا ؟
هو انا جبت الطاقة والقوة دي كلها منين ؟
وانا ازاي فقدت الطاقة والقوة النفسية اللي تخليني اصبر واحلم واجاهد واتغلب على نفسي ؟

هما الناس بيختفوا لما بنحتاجلهم علشان هما مش قريبين ولا علشان ربنا بيقول لنا منلجأش لغيره ولا علشان مفروض نستمد القوة من جوانا مش م الناس ؟؟
بس انا اصلا معنتش محتاجة حد .. لان مش اي حد يقدر يستوعب كم الالم اللي جوايا ومش اي حد هيقدر يحتويني
هو في حد اصلا هيقدر ؟؟؟؟؟؟؟

مبقتش حمل اي فروض او التزامات
عايزة اعيش فترة من غير اي التزام

يارب
انا كل ما اجي ادعيلك واقول يارب
الاقي لساني ميقولش غير الحمدلله
مش عارفة اشكيلك
بس انت عالم بحالي
وانا عمري ف يوم ما هشتكي من قدرك .. حتى لو ليك
انا مش عايزة اقول يارب خفف عليا
لاني بجد عارفة وحاسة ان كل حاجة منك خير
وان كل محنة بتبعتلنا معاها منحة
وان كل ابتلاء عمره ما بيكون شر
انا بس عايزة اقول يارب اني ضعيفة وعايزاك تقويني
علشان اقدر اصبر على اي ابتلاء
وعايزة اقول يارب الحمدلله وبجد بحمدك على الضراء قبل السراء
بجد الحمدلله على القدر اللي انت كاتبهولي
انت عارف يارب اني راضية بكل حاجة ومش تفضل بس ده يقين فيك
لكن انت عارف يارب اني مليش مصدر استمد منه قوتي غيرك
قويني يارب وارزقني الصبر والرضا
وقوي ايماني يارب
انا واثقة اني لما هكون قريبة منك هتبقى كل حاجة كويسة
وهكون انا ف احسن حال
ياااااااارب

تهييسات

مُؤْلِم ..
أَنْ يَتَحَوّل وَاقِعُك إِلَى ذِكْرَيَات .. مُؤْلِمَة ..!

مُسْتَفِزّ
أَنْ تَشْتَاق لِمَاضٍ .. تَعْلَم يَقِيناَ أَنّه لَنْ يَعُود !

جُنُونِيّ
أَنْ تَعِيش حَيَاتَك تُفَكّر فِي شَيْء .. وَتَحْلُم بِشَيْء .. وَتَفْعَل شَيْء ثَالِث !

سَاخِر
أَنْ تَفْقِد رَوْحَك .. وَتَعِيش بِنَفْسٍ غَيْر نَفْسِك .. فَلَا أَنْتَ حَي ّ.. وِلَا أَنْتَ مَيّت !

مُمِيت
أَنْ تَكُون فِي أَمَسّ الحَاجَة لِشَيْء .. لَيْسَ فِي مَقْدُورِك نَيْلُه .. أَقَلّه فِي الوَقْتِ الحَالِي .. لَكِن حَيَاتَك لَا مَعْنَى لَهَا بِدُونِه .. بَلْ أَنّهَا لَيْسَتْ حَيَاة بِالمَرّة!

مُهْلِك
أَنْ تَقْتَصِر سَعَادَتُك عَلَى شَخْصَيْن .. أَحَدُهُمَا قَدْ فَارَقَك .. وَلَا تَعْلَم إِنْ كُنْتَ سَتَسْتَعِيدُه .. وَالآخَر غَيْر مَوْجُود ... سِوَى فِي خَيَالِك !

طَبِيعِي
أَلّا يَفْهَمك النّاس .. إِنْ كُنْت أَنْتَ لَمْ تَعُدْ تَفْهَم نَفْسَك !

مُهِين
أَنْ تَنْهَى النّاسَ عَنْ فِعْلٍ .. أَنْتَ تَفْعَلُه !

قَاسٍ
أَنْ يَكُون حُلْمُكَ الوَحِيد .. أَنْ تَرْتَمِي فِي أَحْضَان أَحَد .. أَيّ أَحَد .. وَلَا تَجِد سِوَى يَدَيْك لِتَضُمّك !

صَعْب
أَنْ تُحَاوِل أَنْ تَذَكّر مَتَى آخِر مَرّة ضَحِكْت فِيهَا مِنْ قَلْبِك .. وَفِي النّهَايَة تَتَذَكّر أَنّك أَبَداً لَمْ َتْفَعل !

مُحْبِط
أَنْ تَمْتَلِئ حَمَاسا لِفِعْل شَيْء تُجِيدُه .. وَحِينَمَا تَهُمّ يِالقِيَام بِه .. تَسْتَسْلِم مِنْ أَوَل مُحَاوَلَة ..!

كَئِيب
أَنْ تَجْلِس وَحِيداً فِي مُنْتَصَف اللّيل أَوْ آخِرِه - لَا تَدْرِي - .. تَسْتَمْع بِإِنْصَات لِدَقّات السّاعَة .. رَغْم أَنّهَا تَقْتُلك .. إِلّا أَنّهَا الشّيْء الوَحِيد الذِي لَازَال يُسْمِعك صَوْته !

مُخْزِي
أَنْ تَثِق بِكُلّ البَشَر .. وَفِي النّهَايَة .. تَكْتَشِف كَمْ أَنْتَ ... مُغَفّل !

مُبْكِي
أَنْ تُحَاوِل أَنْ تَبْكِي .. عَلّك تَرْتَاح .. فَتَجِد دُمُوعَك قَدْ جَفّت ..! 

who am I?

مبقتش عرفاني

........

ركن

عايزة أقعد في ركن بعيد

محدش يشوفني ولا أشوف حد

عايزة أتكوم في نفسي

وأفضل أعيط

لحد ما دموعي كلها تنشف

عايزة أستخبى جوا نفسي

عايزة أختفي ومحدش يلاقيني

ولا أنا ألاقي نفسي

مش عايزة حضن

مش عايزة حد

مش عايزة غير ركن

يسعني

ويفضل يضيق بيا

لحد ما يكوّمني جوا بعضي

مش عايزة براح

عايزة كل حاجة تفضل تصغر تصغر

لحد ما الفراغ كله يختفي

وضيق المكان يختزلني

الحياة بقى لونها سماوي

 

طالبة انبساط معايا النهارده

صاحية منشكحة كده ومتحمسة اوي للحياة

مش عارفة ليه كل اللي بيحس الحياة حلوة بيقول "الحياة لونها بمبي"

انا بقى البمبي مش احلى لون عندي ولا حاجة

عادي يعني

انا بقى بحب اللون السماوي وبمووووت فيه

وشايفة ان الحياة الحلوة لازم يكون لونها سماااااوي

انا حرة بقى اشوف الحياة باللون اللي يعجبني

بفكرني بالاعلانات بتاعت سباركل ..

انا بقى عايزة الحياة كلها تبقى سماوي سماوي سماوي :)

 لون عسول اوي والله

يلا ..

يارب دايما ايامكوا وحياتكوا كلها تبقى سماوي

:)

 

message 2

بشكرك بجد على أحلى أيام قضيتها ف حياتي

وبشكرك ع الأخوة في الله اللي معرفتش معناها غير معاكي

بشكرك على صداقة عمرها ما هتتعوض

وبشكرك على أجمل ذكريات سبتيهالي

شـكـــــــراً :)

* Another draft from my mobile phone

ذوبان

نفسي أدوووووووووووب

سقوط

ربما أردت السقوط ..

فقط كي أثبت لنفسي أن هناك شيء أسفل مني

وأنني لم أصل إلى القاع بعد

...............

* ده تعليق على اللي كنت كتباه في البوست قبل اللي فات "عني" .. اني عايزة اقع من الدور العاشر ومكنتش اعرف السبب :)

message

" القرب مش بالمسافات على فكرة

ولما بتحب حد مش بس بتحس انه محتاجلك

لكن كمان انت بتحتاجله

مش شرط لما حد يحتاجك جنبه يبقى علشان عنده مشكلة

ساعات بتكون مشكلته الوحيدة انك مش جنبه

محتاج يحسك معاه مش أكتر

الحب أحياناً بيكون مش كفاية .. حتى لو اللي بتحبه متأكد من حبك ليه

لازم يحس بده ويلمسه "

..........

* A draft from my mobile phone

عني

وحشتني الكتابة .. عايزة اكتب .. او محتاجة اكتب
مش عارفة ايه م التلاتة .. ولا كلهم مع بعض
مشغولة اوي لدرجة اني مش لاقية وقت اكتب
وفاضية اوي لدرجة اني مش لاقية حاجة اكتبها
!!!

مع اني عندي وقت لا بأس به فاضي بس حاسة اني مشغولة اوي .. او ع الاقل دماغي مشغولة
ومع اني جوايا حاجات كتير بس حاسة اني مفرغة .. مفيش حاجة تتكتب ..
اما ان الحاجات الموجودة اكبر من انها تتبلور ف حروف .. او انها اتفه من انها تتجسد ف حروف
مع اني تقريبا خرجت من حالة (اللاحياة) اللي كنت عيشاها .. الا انه الظاهر اني مازلت اعاني من بعض اعراضها

حساني بدور ف دايرة مفرغة ..
او زي ما سمعت من حد مش فاكراه حاجة اول مرة اسمعها بس ممكن تكون توصيف ليا ..
لما قال "مطرح ما يحط راسه يلاقي رجليه"
انا حساني كده .. بس مش واقفة ف مكاني .. بتحرك .. لكن حوالين نفسي .. او بتحرك في مكاني يمكن !

دماغي مش عارفة مالها .. مشغولة اوي .. وفاضية اوي

الحتت الناقصة جوايا عمالة بتزيد .. كل ما افكر اتغاضى عن حتة تيجي حتة تانية تنقص ومحتاجة تتملا
اماكن جوايا محتاجة ترميم .. واماكن تانية مهجورة محتاجة اللي يعمرها .. واماكن مفروض عليها مستنية اللي يسكنها
واماكن اهلة بالسكان .. بس عمالة بتصغر .. مش علشان سكانها بيهاجروا .. لكن علشان الحتت التانية بتزيد .. فبتخبيها

البقع السودا جوايا بتكبر .. خايفة الابيض تختفي معالمه

مبقتش افرح لما حد يحاول يسعدني .. بحسها مصطنعة .. او مقصودة علشان انا عايزة كده .. مش علشان الحد ده اللي عايز كده او انه تصرف تلقائي منه
اساسا محدش بيحاول يسعدني .. محدش شايفني حزينة علشان يفكر يسعدني .. محدش شايفني اصلا

مبقتش حاجة بتشدني .. لا المسلسلات الاجنبي البوليسة اللي بعشقها ولا تصفح المدونات زي ما بحب .. حتى لما بدخل وبقرأ حاجة مبعلقش .. مليش نفس امارس اي هواية

عندي رغبة ملحة اني اساعد الناس واقف جنبهم واقول لهم انتوا مش لوحدكوا .. تفاءلوا .. اتحدوا نفسكوا .. حبوا نفسكوا .. ثقوا ف نفسكوا .....
يمكن علشان محتاجة اللي يقول لي الكلام ده بس مش لاقياه .. فبقوله للناس علشان مش عايزاهم يحسوا احساسي .. مؤلم اوي
لا واللي يدعو للسخرية اني مع اني مش بعرف اقرب اوي من الناس .. لكن بحاول اقرب الاقيهم بيبعدوا .. او مش بيبعدوا بس بحس كده

بقى مجرد حلم بالنسبالي اني الاقي واحدة نبقى اصحاب .. اصحاب بجد يعني
كنت بقول لنفسي دايما اني متأكده اني هلاقيها ..
لكن دلوقتي مش عارفة .. مش مستحملة اصبر اكتر من كده .. محتاجاها اوي

اكتر حاجة محتاجاها الفترة دي وكل يوم بيزيد احتياجي ليها عن اليوم اللي قبله
هي .. " حضــــــن "
نفسي اوي اترمي ف حضن حد .. نفسي ضلوعي تتكسر من قوة الحضن

محتاجة ادوووووووووب
مش قادرة اتماسك
بس كمان مش عارفة ادوب

نفسي افضل في اوضتي لوحدي يومين تلاتة متواصلين
محدش يكلمني ولا اكلم حد .. ولا حد يشوفني ولا اشوف حد .. ولا اسمع حتى اي صوت
مش عارفة ازاي حاسة بوحدة وازاي محتاجة العزلة

حاسة اني بتلكك على اي حاجة تخليني اكتئب
او يمكن مش بتلكك .. بس لان جوايا حاجات كتير تخليني اكتئب .. فأي قشاية بتصحي شعور الاكتئاب اللي كان خامد جوايا

مسيطرة على دماغي دلوقتي فكرة اني اعلم شوية اطفال اي حاجة .. قران وتنمية بشرية وكل حاجة
يمكن علشان بحب الاطفال اوي .. ويمكن علشان محتاجة احس برائتهم .. ويمكن علشان يضيعوا شعوري بالوحدة

عايزة انط م الدور العاشر ..
مش علشان انتحر ولا حاجة
بس عايزة احس الاحساس ده .. عايزة اقع من فووووووووق
مش فاهمة ليه .. بس هو كده

بقيت بفتقد الناس بطريقة غريبة ..
او بمعنى اصح بحس بوجودهم .. علشان كده بحس بغيابهم
مش ناس معينين .. اي ناس
مش لان وجودهم مؤثر .. بالعكس ممكن يكونوا ناس مش بحتك بيهم .. او حتى اصحاب مدونات بقرألهم من غير ما اسيب تعليق حتى
يمكن من كتر احساسي بالوحدة واحتياجي لاي حد يملا الفراغ اللي جوايا ..
فبحس اكتر بالوحدة دي لما الاقي الناس بتغيب .. بحس الناس بتنفض من حولي ..
مع انهم فعلا (حولي) مش (جنبي) ولا (بيحتووني)

عايزة السنة تخلص بقى
عايزة ارجع اخد كورسات تاني .. مش بينفع غير ف الاجازة
غير اني عايزة الكورسات علشان محتواها ..
لكن يمكن دلوقتي بالذات علشان عايزة اشوف ناس كتير
من غير ما يكلموني ولا اكلمهم .. لكن بس اكون في وسطهم

مش عايزة انام خالص ..
مع اني الايام دي بحب انام علشان اهرب من الواقع
بس دلوقتي عايزة افضل صاحية ..
مش عارفة ليه

في حاجات مبتتقالش .. بتتحس بس

في حاجات لما بتتقال مبيبقاش ليها طعم بعد كده



بودي رووووووح قلبي

بموووت فيك يا قمر

هنا كنت قاعدة اقول له اضحك علشان اصورك فعمل الابنسامة الصفرا دي

هنا مكانش فاضيلي كان بياكل الشيبسي

بيبصلي من فوق

مش عارفة ايه نظرة التعالي دي

كان بيريحني علشان يخلص مني

مش هاين عليه يسيب كيس الشيبسي علشان يتصور

كل ما كان يبص ف المراية دي يبقى مذبهل .. ازاي شايف واحد شبهه :)

الباشا الكبير

التشرد كله

لبسته الكاب بالعافية

دي وهو بنوتة

هنا وهو بيقول ارفع راسك فوق انت هندي

دي الدكتور بودي وهو لابس نضارتي



مش فاكرة كان بيضحك على ايه

* بودي ده ابن اختي

كنت عايزة ارغي عنه شوية بس بصراحة مليش نفس اتكلم خالص

كفاية الصور بقى

بعشقه اوي بجد

كده يعني

عنب بقى 

* عنب دي مصطلح خاص بيا .. مش عارفة له معنى عند ناس ولا لا .. بس عموما هو معناه بالنسبالي يعني ......... يعني عنب يعني

عموماً اللي مش فاهمه يرجع للصور اللي فوق .. هو ده تقريبا معناه عندي
وخصوصا اول صورة .. بغض النظر عن المصاصة طبعا :)

دمتم معنبين :)

هكون



رغم الأسى والاستسلام

هكون

ورغم الضعف والانهزام

برده .. هكون

هتقويني إرادتي

وهتحدى كل الكون

هحاول حتى لو هفشل

ومهما وقعت .. هرجع أقوم

وان يئست أو ضليت طريقي

هرفع إيديا للسما .. واطلب العون

بغلط صحيح وبحبط ساعات

لكني بشر .. منيش معصوم

ولإني بشر ، كرمني ربي ..

لا يأسي هيوقفني .. ولا حزني هيدوم

وإيماني هو رفيقي

بيه أكمل طريقي

ده ربي لو يأذن

يقول للشيء "كن" .. يكون

هكون

ومهما طال بيا الطريق .. هكون

ومهما بعدت المسافات .. هكون

وهدفي حتى لو بعيد .. هيكون .. وهكون

(( بإذن الله ))
ـــــــــــــــــــــــــــــــــــــــــــــــــــــــــــــ

مش عارفة ايه جرعة التفاؤل المفرطة اللي وخداها النهارده دي :)

يلا

الحمدلله



ياااااااااااااه

مشيييت تحت المطر

شعور جميل اوي :)

فرحاااااااانة