اقرأني

نَحْتَآجُ إلَى قَلْبٍ يَقْرَأ ثَرثَرَة الضّجْيج بِ دَوَآخِلنَآ دُونَ التّفَوه بِ كَلمَةٍ وَآحِدَة

كوكتيل

بيبان عليكي اوي على فكرة
علشان مش بعرف اتلون

شكلك اتعودتي تزنقي نفسك وف اخر لحظة تعملي كل حاجة .. بتحبي تتعبي اوي علشان تحسي النتيجة؟

او بحب اكسل اوي .. علشان كده مش بتعب غير ف اللحظة الاخيرة

مش عارفة تبقي راجل لمدة 3 شهور ؟
شكلي مش عارفة ابقى راجل لمدة يوم واحد

اثبتي لكل اللي حواليكي انك مش انسانة فاشلة
محتاجة اثبت لنفسي قبل اللي حواليا

كنتي فين من الاول ؟

كنت متقوقعة ..

كلنا واثقين انك تقدري
انا بقى مبقتش واثقة

فين منار بتاعت زمان ؟

منار بتاعت زمان مبقتش موجودة .. اختفت

انتي احسن من كل حد

انا اسوأ من اي حد

انتي احلامك كتير اوي

انا مبقتش احلم .. غير باني ارجع احلم !

يااااااه انتي لسة عايشة؟ انا افتكرتك متي ولا حاجة

ما انا ميتة من زمان اصلا

محدش بيشوفك ليه؟

انا اصلا مش شايفة نفسي

مالك ؟

مفيش

انا فاهماكي اكتر مما انتي فاهمة نفسك

يبقى مبتفهميش!

انا اساسا مبقتش فاهمة نفسي

انتي احلى حاجة ف حياتي

انا أسوأ حاجة ف حياتي

كل اللي حواليكي بيحبوكي ومهتمين بيكي

انا اصلا مفيش حد حواليا

انتي معيشة نفسك في وهم اسمه الوحدة

الوحدة عايشة ف وهم اسمه انا

انا مبسوطة علشان انتي مبسوطة
وانا مبسوطة انك مبسوطة اني مبسوطة

ببقى مبسوط لما بتكوني مبسوطة
وانا ممتنة ليك بجد :)

انتي غريبة اوي على فكرة

عارفة

.................

انتوا اصلا مبتسمعونيش

مفيش حد بيسمعني

لا .. سمعت كل كلمة قلتيها

سمعتي مش استمعتي

مش مركزة معايا

نفسي حد يسمع جوايا

بس ازاي ومفيش حد بيسمع برايا ؟!

احنا واثقين فيكي وواثقين انك عارفة مصلحتك كويس وواثقين كمان في اختياراتك

مبقتش بعرف اختار

صح ولا غلط ؟

معرفش .. مش عايزة افكر

طب ازاي ؟

انا عندي يقين ان لو ده قدر مكتوبلنا يبقى هيحصل

مش عارفة ازاي .. بس واثقة ف ربنا اوي

تعرفي؟ انا بحس بالفخر لما بكون ماشية جنبك

وانا بحس اني صغيرة اوى جنب كل الناس

اتغيرتي يا منار

لا .. متغيرتش ..

انتي اللي مش شيفاني كويس ..

او مكنتيش اصلا شيفاني م الاول

انا قلتله ان البنت دي عقلية ملهاش حل بجد

يبقى هيتصدم !

انتي متشائمة اوي

انا متفائلة اوي اوي

اوي

انا كنت مرتبطة وانتي ؟

لا

مش مقتنعة

مشاعري اغلى من اني اديها لاي حد

عمرك ما حبيتي قبل كده ؟

لا طبعا حبيت

ناس كتير حواليا

لا انا اقصد حبيتي واحد

عارفة .. بس قاصدة اقول كده

علشان انتوا بتقصروا الحب على حاجة واحدة بس .. مع انه بحر واسع

يعني حبيتي ولا لا؟

لا ومش ناوية احب قبل الجواز

بس ده مش بمزاجك

بمزاجي اني محتكش احتكاك مباشر بأي واحد وبالتالي مش هعرف حد علشان احبه

بس مبقاش حد بيفكر كده

انا بفكر كده .. ومقتنعة بكده

بس انا بحبه اوي

اللي بتحب واحد بتحافظ على نفسها له حتى لو منه

وهو بيحبني

اللي بيحب واحدة بيحافظ عليها حتى لو من نفسه

انتي مجنونة على فكرة

دي الحاجة الوحيدة اللي راضية عنها فيا

انا عمري ماشفت زيك ولا هشوف

علشان لو كان في اتنين مني كانت خربت

انتي مهيسة كده ليه

التهييس هو اقصى مراحل الخنقة

انا واثقة فيكي على فكرة

وانا نفسي اكون قد الثقة دي على فكرة

تعرفي انتي كنتي ازاي؟

المهم بقيت ايه

انتي مخلصة اوي

يعني ايه اخلاص؟

ــــــــــــــــــــــــــــــــــــــــــــــــــــــ

- حياتي من غيرك ضلمة اوي

- حياتي من غيرك كانت هتبقى عادبة اوي

- انا بردانة اوي .. اوي .. اوي .. مفيش حضن للبيع؟!!

ـــــــــــــــــــــــــــــــــــــــــــــــــــــــــــــــــــــــــــــــــــــ

على فكرة الكلام اللي فوق لا يعكس اي صورة عن مودي الحالي

انا كويسة الحمد لله :)

إنه كان بي حفيا

♥ "  إِنَّهُ كَانَ بِي حَفِيّاً " ♥ 

 آية فاقت حد الروعة بجد

قد ايه جميل لما تحس ان ربنا جنبك ومش هيسيبك

قد ايه جميل لما تحس ان ربنا رحيم بيك

قد ايه جميل لما تكون في عز ازمتك وتلاقي ربنا بيطبطب عليك

بآية تقع عينيك عليها او تسمعها وانت ماشي وتلاقيها بتتكرر قدامك كتير

كأنها رسالة من ربنا ليك

او بخيط نور رفيع اوي بس بتحسه ملا الدنيا كلها نور

او بانسان حتى لو متعرفوش تلاقيه واقف جنبك من غير سبب

♥♥♥

♥ " إِنَّهُ كَانَ بِي حَفِيّاً " ♥

لما تحس كرم ربنا عليك

لما تحس انك مهما تعمل ربنا عمره ما قفل بابه ف وشك

لما تحس انك وانت بتعصاه بيبعتلك رسايل علشان ترجعله

وانت بعيد عنه تلاقيه قريب منك

وانت ف عز غفلتك تلاقيه بيغدق عليك نعمه
لما تحس ان ربنا دايما بيديك اكتر من اللي تستحقه

♥♥♥

♥ " إِنَّهُ كَانَ بِي حَفِيّاً " ♥

لما تحس ببحر حنان وعطف

متعرفش منين ولا ازاي

ربنا بعتهولك

لما تحس بحنانه ليك وقربه منك وخوفه عليك انت العبد

♥♥♥

♥ " إِنَّهُ كَانَ بِي حَفِيّاً " ♥

قد ايه هو رب عظيم

قد ايه انت صغير اوييييييي قدامه

وقد ايه هو كبيييييييييييييييييييييير اوي

♥♥♥

♥ " إِنَّهُ كَانَ بِي حَفِيّاً " ♥

عارف يعني ايه تكون غرقان في همومك ومشاكلك وذنوبك وظروف الدنيا

وتلاقي ايد حنينة بتطبطب عليك ؟

عارف يعني ايه تملاك المشاكل وتسيطر على كل كيانك

وقبل ما تنهار تترمي ف حضن يحتويك ؟

عارف يعني ايه تحس انك مرمي ف قاع بير غويييط ومش عارف تخرج منه

وتلاقي ايد اتمدتلك وانتشلتك من القاع ده ؟
عارف يعني ايه تكون بردااااااان اوي .. مش لان الدنيا برد .. لكن روحك هي اللي بردانة
وتلاقي حد يختزل كل دفا الكون ويديهولك ؟

♥♥♥

♥ " إِنَّهُ كَانَ بِي حَفِيّاً " ♥

عمرك حسيت قبل كده ان المحنة اللي ربنا ابتلاك بيها جواها منحة ربنا بعتهالك ؟

عمرك فكرت في السحر ان ربنا في السماء الدنيا بيقول

( من يدعوني فأستجيب له .. من يسألني فأعطيه .. من يستغفرني فأغفر له ) ؟

عمرك حسيت انك نفسك اوي ف حاجة ومش عارف توصلها ازاي وتلاقي ربنا بيقول ( ادعوني أستجب لكم ) ؟

عمرك حسيت انك غرقان في الذنوب وعايز تتوب وخايف ربنا ميقبلكش وتلاقيه بيقول ( قل يا عبادي الذين أسرفوا على أنفسهم لا تقنطوا من رحمة الله ) ؟

عمرك  استشعرت الحديث لما الرسول صلى الله عليه وسلم شاف ام بترضع ابنها ووخداه في حضنها وسأل الصحابة ( أترون هذه المرأة طارحة ولدها في النار؟ ) وبعدها قال ( لله أرحم بعباده من هذه بولدها ) ؟

♥♥♥

♥ " إِنَّهُ كَانَ بِي حَفِيّاً" ♥

بجد آية لو استشعرناها هنحس اننا في ملكوت تاني

ربنا كبير اوي بجد

ورحيم اوي بجد

وكونه يهدينا لاننا نتفكر في اية زي دي ده في حد ذاته رحمة منه انه يخلينا نحس برحمته ! :) 

      

امتنان



إلى أولئك الذين يقفون بجانبنا

وهم لا يريدون منا شيء

سوى أن نكون بخير

كم هي رائعة تلك النظرة التي تعتلي وجوههم وقتها

نظرة يملؤها الخوف علينا والصدق المطلق

وكم هو رائع ذاك الشعور الذي يمدونا به

حين نسمع كلماتهم

فترتسم البسمة في قلوبنا قبل شفاهنا

♥ ♥

إلى الذين صادفتهم في حياتي وكانوا على هذه الشاكلة

ممتنة أنا لكم

أشكركم بحجم قلوبكم وما تحمله من طيبة وإخلاص

♥ ♥ ♥

my mood

حاسة اني شايلة حمل تقييييييييل

ومش عارفة أبدأ منين



لو بطلنا نحلم نموت

قالوا .. لو بطلنا نحلم نموت

حلمت .. وحلمت .. وخليت الحلم ليا قوت

حلم بحياة ..

حلم ف حياة ..

وحلم هو أصل الحياة

وعشان مبطلتش ف يوم أحلم .. يستحيل إني أموت !

ـــــــــــــــــــــــــــــــــــــــــــــــــــــــــــــــــــــ

كان في دماغي اكتب كلام تاني خالص بس هي جت كده بقى

وكان في دماغي برده اكملها بس مليش نفس بصراحة دلوقتي

او يعني الوحي راح مشوار :)

يلا بقى

خير الكلام ما قل ودل

طريق

انت اللي مسئول عن الطريق اللي بتمشي فيه ...

حاجة مستفزة وتحرق الدم بجد
نفسي بقى انعزل عن العالم كله
زهقت من كل الناس
عايزة اعيش لوحدي
اتخنقت منهم بجد
حتى اليوم اللي كنت هذاكر فيه تيجي حاجة تخنقني
مبعرفش اذاكر وانا متضايقة
نفسيتي زفت دلوقتي
تولع بقى المذاكرة
عايزة كل العالم يسيبوني ف حالي بقى
مش عايزة اشوف اي كائن بشري قدامي ولا اسمع صوت اي مخلوق

نفسي اوي ف حد دلوقتي من غير ما احكيله اللي حصل يهديني ويخفف عني ويرجعني زي ما كنت من خمس دقايق
بس للأسف انا طول عمري لوحدي
اكبر غلطة غلطتها ف حياتي اني من صغري عيشت نفسي بعيد عن الناس
طبعا دلوقتي انا مقتنعة تماما انه احسن حاجة اني ابقى بعيدة عنهم
بس ف نفس الوقت
محتاجة حد واحد بس
معرفش هو مين
بس عايزاه يكون كائن معمول مخصوص علشان الاوقات دي
يطبطب عليها وياخدني ف حضنه
ميسألش فيا ايه
هو بس يشيل عني كل همومي وكل حاجة مضايقاني
معرفش ازاي
بس يعمل كده وخلاص
ومش عايزاه يفضل ينصحني ولا يخفف عني بالكلام اللي كل الناس بتقوله لكل الناس
انا عايزة فعلا اهدى اول ما يقول لي كلمتين معرفش ايه هما
بس مش عايزة كلام من فصيلة معلش واصبري وانتي مش عايشة لوحدك واستحملي ومش كل الناس كده والجو ده
انا عايزة لما افكر بغباء يستغبى هو كمان
ياخدني على قد عقلي
وميحاولش يتفه من اي حاجة انا مكبراها
حتى لو هي تافهة بجد
على الاقل وقتها يحاول يكبرها معايا
وبعد ما الموضوع يعدي يبقى يتفه زي ما هو عايز
نفسي اتنهد تنهيدة الواحد لما يكون ماشي ف طريق طوييييييييييييل ويوصل اخييييييرا لهدفه
نفسي ف التنهيدة دي
لما الاقي الكائن الخرافي ده
ممكن افصله بقى عند ترزي اتخيله يكون فعلا موجود اي حاجة بقى

هو ضعف ايمان اننا نحتاج لحد يطبطب علينا ؟ علشان يعني المفروض نشتكي لربنا وحده وفعلا نحس اننا ارتحنا لما نرفع ايدينا وندعيه ونشكيله
ولا هي فطرة فينا علشان ربنا خلقنا اجتماعيين بطبعنا يبقى طبيعي هنحس اننا محتاجين لحد ولازم حد جنبنا يخفف عنا؟؟
بزعل لما بحتاج لحد علشان بحس ان كده ايماني ضعيف والمفروض الجأ لربنا بس
بس بصبر نفسي واقول ان دي فطرة
معرفش بقى
بس بدعي ربنا يقوي ايماني ومحتاجش لغيره
وكمان بدعيه يرزقني بحد يطبطب عليا وحضنه يبقى ملاذي من كل هموم ومشاكل الدنيا .. ومن كل القرف بتاع الناس

فاصل ونواصل

هعمل مقاطعة ان شاء الله للمدونة والنت والكمبيوتر كله لحد ما اخلص مذاكرة
طبعا مش لحد الامتحانات
بس يعني لحد ما احس اني قطعت شوط كويس في المذاكرة

الحقيقة مش واثقة اوي اني هنفذ ده فعلا لاني بقيت الايام دي عيلة اوي ف حكاية القرارات دي
بس ربنا ييسر


هتوحشني المدونة
هكتب في ورق اي حاجة حابة اكتبها ان شاء الله ولما ارجع ممكن ابقى احطها ف المدونة .. وممكن لا
وممكن الاقيني بكرة في المدونة عادي خالص :)


ربنا يستر بقى عايزة ابقى رااااجل المرة دي
اي حد يشوف البوست يدعيلي بقى اذاكر كويس والتزم بقراري

بس كده

ساعات

ساعات بيكون توقع السعادة ألذ كتير من السعادة نفسها .. !

أكثرها وحدة

إنها أكثر الأوقات وحدة بالنسبة إليّ

تلك التي أتأهب فيها للنوم

الغرفة كما أحبها دائماً

بابها مقفل

يكاد يسودها الظلام الدامس

الهدوء يملأ المكان كما هو الحال في الليل

لا أسمع سوى صوت عقارب الساعة

تلك ( التكتكات ) التي تكاد تصيبني بانهيار عصبي

وينتهي بي الحال دائماً بانتزاع حجائر الساعة قبل أن يُجن جنوني

أما أنا

فأكون قابعة في الطرف الأبعد من السرير

وجهي تجاه الحائط

أتخيل أحداً لا أعرف حتى من هو

ولكني أتخيله بجواري

يربت على كتفي

ويضمني بقوة حد الاختناق

إلى أن يقضي على كل شعور بالوحدة يتملكني

وعندما أفتح عينيّ

أجد تلك اليد التي تحتضنني إنما هي يدي

وقد ألقيت بوسادتي بعيداً ..

لأني سئمت من احتضانها .. وهي ساكنة لا تلفني بذراعيها

أعود لخيالاتي

وأتمنى لو أن ذاك الكائن الوهمي ينتشلني من وحدتي ..

إلي عالمه

وعندما أدرك أن تلك الخيالات لم تتحقق

أعود إلى الواقع

أمسك بهاتفي المحمول

أنتظره يرن ..

وأنا واثقة من أنه لن يفعل

ولكني في محاولة يائسة ..

أرجوه أن يفعل

أريد أن أسمع أي صوت آدمي غير صوتي

وفي أوج خيالاتي الوهمية وآمالي اليائسة ..

يغلبني النوم ..

فلا أشعر بشيء

وأخالها أجمل لحظاتي ..

إذ يغيب عني شعور الوحدة ..

الذي ما يلبث أن يعاودني في الليلة التالية

ــــــــــــــــــــــــــــــــــــــــــــــــــــــــــــــــــــــــــــــــــــــ

p.s.

لا أعلم لمَ تزعجني دقات الساعة تلك

ربما لأنها تعد ثوانيّ

فتُشعرني ببطء الوقت

أو بأنه ساكن لا ينقضي .. !

وربما لأن ضجيجها

يقطع هدوء وحدتي

فيُشعرني أكثر بذلك الهدوء .. !

وربما أن الضجيج بداخلي اشتد

لدرجة أني لم أعد أحتمل أي ضجيج آخر

حتى وإن كان هذا الضجيج الآخر هو في الواقع

مجرد

( تكتكات ) .. !

أو ربما ليس لشيء

سوى أنها بالفعل مزعجة

وتؤذي غشاء طبلتي الأذنية .. !

ـــــــــــــــــــــــــــــــــــــــــــــــــــــــــــــــــــــــــ

بتاريخ

امبارح

الساعة 2.30 بالليل

قبل ما انام !

نصمت



لأنَّ لا شَئ يَتسعُ لِضجيج أحَاديثُنَا ، نَصمُتْ 

طظ


اللي مش عاجبه طظ !

وماذا عساي أن أفعل ؟؟؟

احتويني

ضمني

خبيني ف ضلوعك

حسسني بالأمان

امسح دمعتي

ارسم بسمتي

على صدرك خليني أنام

بدّل بردي دفا

نسيني الخوف والجفا

اغمرني بالحنان

كُونلي العالم وما ليا

بجوارحي وكل ما فيا

دوبني جواك وقّف الزمان

اختزل أيامي وسنيني

ضحكاتي آهاتي وأنيني

في لحظة ف حضنك تحتويني

وتنهي حربي بسلام

لو مشاكلي تهدني

ف حضنك أترمي

بدراعاتك أحتمي

تحققلي كل الأحلام

واذا غرقِتْ مركبي

أو تهت يوم عن كوكبي

تكونلي شراع ومرسى

توصلني لبر الأمان

♥  ضمني .. احتويني .. ف حضنك خليني أنام  ♥

ــــــــــــــــــــــــــــــــــــــــــــــــــــــــــــــــ

طبعا الكلمات مش لحد

او يمكن لكائن خيالي

مش موجود غير ف خيالي

:)

!

مفيش

مالك ؟؟

بكره السؤال ده

اللي فاهم اللي فيا
كويس

واللي حاسس بيا
شكرا

واللي يقدر يطلعني م المود ده حتى لو مش فاهم ولا حاسس
ياريت

لكن اللي مش فاهم ولا حاسس

ميسألش

علشان بتضايق اكتر

وميستناش اجابة

غير

( مفيش )

!!!

اساسا مخنوقة لوحدي

كل ما احاول افك تحصل حاجة تخنقني تاني

ده غير اللي بيحصل ف البلد الايام دي

قصدت متكلمش فيه لان بصراحة زهقت من الكلام من كل حد وف كل حتة

كله بيتكلم كفاية بقى

اللي ف ايده حاجة يعملها واللي مش ف ايده حاجة يدعي ربنا ييسر حال البلد

لكن الكلام بجد كتر وبقى متعب

واكتملت الخنقة بخبر الصبح بتاع موت د.ابراهيم الفقي

مش عارفة اوصف شعوري او اتكلم

بس ربنا يرحمه ويجعل مثواه الجنة ويجعل علمه اللي قدمهولنا ف ميزان حسناته

اللهم امييييييييييييين

ملحمة

إنها ساعة ما قبل النوم

تلك التي تجتمع فيها الأحزان

وتحلق حولنا الآهات

تلك الساعة التي تهرب فيها الدموع لتتساقط فيضاناً لا نهاية له

تؤرقنا لبعض الوقت

ثم

تأذن للنوم أن يحل ضيفاً كريماً

يُذهب الأحزان

أو

يُفقدنا الاحساس بها

لبعض الوقت

وتتجدد الملحمة

كل ليلة

بين الحزن والدموع .. والنوم

مليش نفس

لأي حاجة