سنيني بتجري
وانا بجري
وتجري معايا أنفاسي
تسابقني
وتسبقني
ويهرب مني إحساسي
يخوّفني
ويخدعني
ويوهمني اني ناسي
ويهرب تاني مني
ويسيبني
ويصبح قلبي آسي
والاقي نفسي تايه
غريب .. وسط أهلي وناسي
وانا ف مكاني واقف
مبتحركش
لكن نبض قلبي
مبيقفش
بينبض
وينفض
وانا ف مكاني
مبنطقش
فجأة تاه الحلم مني
أو تهت انا منه
مبوصلش
شايف حلمي قدامي
مستنيني
بيناديني
لكن غيامة جوايا
تضلل على عيني
تصبح عينيا
مبتشوفش
يعلى صوت الندا
ويطول معاه البكا
لكن دوشة الصمت
تخلي وداني
متسمعش !
أمد ايديا .. أدوّر
يمكن أحسه
لكن رعشة ف صوابعي
تخلي كفوفي
متلمسش
قلت يمكن يكون قلبي
هو دليلي
لكنه أصبح غليلي
سجني وسجّاني
وبرده هو سجيني
ميتحررش !
حلمت بحلمي بيتحقق
هيتحقق
وروحي ف السما
بتحلق
ناحية هدفي
لكن
مبتصيبش
صحيت من نومي
وصبحت وحلمي لساه
برده متحققش
ماهيتحققش !
ـــــــــــــــــــــــــــــــــــــــــــــــــــــــــــــــــــــــــــــــــــــــ
كلام كتبته من غير ما احس اني بكتب
او هكتب
او ايه اللي بكتبه
بس يمكن علشان حياتي متلخبطة شوية اليومين دول
حسيت كل حاجة بتضيع مني
ربنا يستر
!
حلو اوى الكلمات
ردحذفبس ليه التشاؤم حبيبتى
فى جمله صحيت من نومي
وصبحت وحلمي لساه
برده متحققش
ماهيتحققش !
ليه بقى ماهيتحققش
كل سنه وانتى طيبه وعسى ان يكون عامك الجديد اكثر تفاؤل
تحياتى
وانتي طيبة حبيبتي
ردحذفمش عارفة تشاؤم ولا لا
لكن انا لو استمريت زي ما انا دلوقتي يبقى فعلا ماهيتحققش
يااااااارب يكون عام جديد مليان تفاؤل وسعادة ليا وليكي يارب
سعيدة بتعليقك على كلامي المتواضع
كل سنة وانتى طيبة
ردحذفسنة جديدة يكون فيها خير وسعادة وتفاؤل ان شاء الله
الكلام جميل بس جارح اوى لنفسك
اليأس صعب
حاولى تغيرى الاحساس
تحياتى
وحضرتك طيب ويارب تكون سنة جديدة افضل م اللي قبلها
ردحذفامممممم
لو قدرت اغير اسلوب حياتي شوية احساسي هيتغير لوحده اكيد
مش سهلة طبعا
بالرغم من اني مقتنعة تماما ان اللي عايز يعمل حاجة بيعملها
لكن يمكن الايام دي نفسي مسيطرة عليا شوية
اتمنى تكون فترة وهتعدي
بشكرك على نصايحك دايما