الجمعة، أكتوبر 28، 2011

وتمضي الأيام






أنصاع وراء نفسي
تمضي الأيام
لا أفعل شيء
وتمضي الأيام
وأنا كما أنا
فقط أحزن على المفقود
وأُضيّع الموجود!
تفكيري يكاد أن يقتلني
أقضي ساعات طويلة في النوم
هرباُ من الواقع
ومن أفكاري التي تحاصرني
أستيقط ... أفكر ... يرهقني التفكير ... فأنام ...........................
هذه هي حياتي !!

ــــــــــــــــــــــــــــــــــــــــ

حياتي أصبحت رتيبة
أنا اللي عملت كده
عارفة ان كل حاجة بإرادتي
وعارفة كمان اني لو استمريت كده هضيع نفسي
وهندم
اوي

ـــــــــــــــــــــــــــــــــــــــــــ

( أن ترى حياتك تضيع أمام عينيك
وتكتفي بالمشاهدة !
ان تضيعها أنت بيديك ..

أن تهدم مستقبلك قبل أن تبنيه ..
أن تكرر أخطاءك وتعيد الكرة
وقد ذقت من قبل مرارة الندم !
أن تأتي إشراقة كل صباح جديد تحثك على أن تفيق
وأنت تعرض عنها وتقول "غداً"
وما هو بآت !
كم أنت أحمق .. وكم هو ساذج تفكيرك
وكم هو هاااائل كم الغباء الذي يتملككـ ! )

كياني





رسالة عايزة اوصلها لكل الناس
في أفكار ممكن لما تسمعوها
تضحكوا وتتريقوا عليها
وتشوفوها حاجة تافهة جدا
لانها فعلا في ظاهرها تافهة
بس الحقيقة انها
حاجة جوايا
شعور حساه
فكرة ف عقلي
يعني باختصار
جزء من كياني
يعني لما بتسخروا منها يبقى بتسخروا مني انا
ياريت تاخدوا بالكوا من النقطة دي
لانها بتجرحني اوي
سطحيتكوا مليش ذنب فيها
وياريت دايما تطبقوا الحديث
" فليقل خيرا أو ليصمت "
!!!

شرخ





الفقدان
ما اصعبه من شعور
حين تفقد شخصا عزيزا على قلبك
لا يخرج من قلبك بهدوء
إنما يتنزع روحك انتزاعا
ولا يُبقي لك شيء
حتى الدموع
أخذها معه
مشاعرك واحاسيسك كلها قد ذهبت
فقد وهبتها اياه من قبل
لا يترك لك سوى الالم
الم تعجز الكلمات عن وصفه
تعجز الدموع عن البوح به
يعجز البشر عن فهمه
حتى انت
لا تشعر بشيء
سوى ان في اعماق اعماقك
ثمة شرخ
لم ولن يُشفى
فلا هو انفجار بالكلام او بالدمع كي تستريح
ولا هو انفجار داخلي كي تهدأ نفسك
بل أن البركان يظل خامدا
والشرخ يظل باقيا
لا يغيره الزمان
ولا تمحوه الايام

بين الفينة والاخرى
يهتز داخلك شيء
تحسبك ستُشفى
ولكن هيهات
فالهزة تقويه لا تضعفه

هل سيخيب ظنك فيزول الالم ويندثر؟
هل سيأتي أحدهم ليعطيك ما فقدته وأكثر؟
وهل سيعوض ما انكسر ؟

يجيب الجرح ان لا ...
ويأمل تفاؤلك أن نعم ....

ــــــــــــــــــــــــــــــــــــــــــــــــــــــــــــــــ

( أصعب فقد .. هو أن تفقد ذاتك !! )

الاثنين، أكتوبر 24، 2011

كلام والسلام





مش عارفة اقول ايه
معنديش كلام اقوله
بس عايزة اتكلم
حابة اكتب


مش عارفة اذا كان حد هيسمعني ولا لا
لكن هفضفض
وانا ونصيبي


مش لاقية حتى كلام
ولا قادرة اعرف انا حاسة بإيه


اصعب احساس ... انك متحسش بحاجة !!
بلادة عمرها ما كانت من صفاتك
بس دلوقتي موجودة


....................................


دايما لما بتكلم ( وده نادرا لما بيحصل ! )
بتكلم على اساس ان في حد قدامي بحكيله
مع ان مفيش حد


.....................................


يمكن يكون كلامي ملخبط حبتين
ويمكن ميتفهمش اصلا
بس اهو كلام وخلاص


يمكن يكون بفايدة
يمكن حد يفهمه
يمكن انا نفسي افهمه
او يمكن .. يمكن ارتاح لما اقوله


....................................


محتاجة حاجات .. مش لاقية حد يديهالي


بواجه يأسي بتفاؤل مصطنع
او مش مصطنع
مش عارفة


صحيح مش حاسة ان التفاؤل ده هو شعوري
بس حاساه جوايا


في اعماقي
حاسة بتفاؤل


في اعماقي
فيه بصيص امل


مش عارفة امتى هييجي النور
ولا امتى هيبقى واقع
بس متأكدة انه هيحصل


عندي يقين في ربنا
واثقة فيه بجد


عارفة اني مهما وصلت لحيطة سد
هلاقي المخرج




يمكن اكون مزوداها حبتين
يمكن اكون ببالغ في اليأس والتشاؤم
او بترجم كل حاجة بعقليتي وبفهمي


بس بناء على كل حاجة مريت بيها
اكتشفت ان مش كل حاجة تترجم
بلاش نترجم كل تصرف او كل موقف او كل كلمة لاي حد
خلينا ناخد مرة الكلام زي ماهو
ولو كان ظاهره سيء
نحسن الظن


او الافضل
بلاش نظن خالص
خلينا نسمع الكلام على انه .. مجرد كلام
كلام بيتقال ومواقف بتحصل و........
بس كده


خلينا مرة نتفرج على الواقع من برة بس
من غير ما ندخل جواه او نكون فيه


مش سلبية
ولا لامبالاة


مش عارفة اسميها ايه
بس احيانا بتكون هي الصح


احيانا بنوصل لدرجة
عندها بنبقى المفروض نعمل كده
نعيش ف عالم تاني
منهتمش بحاجة
علشان مفيش حاجة فارقة


برده مش هروب م الواقع
بس خلينا نقول عليها مواجهة


اه مواجهة
بس بشكل مختلف شوية


او نقول وضع الامور في مكانها المناسب
منديش لحاجة اكتر من حقها
مش اي حاجة تنرفزنا ومش اي حاجة تضايقنا ومش اي حاجة تزعلنا
مينفعش نخلي الناس والظروف والمواقف يتحكموا فينا
احنا اللي نتحكم ف نفسنا
نحكم الظروف
ونحكم المواقف والناس


صحيح مش هنقدر نخلي كل واحد يتصرف على مزاجنا
ومش هنعرف نمشي الظروف زي ما احنا عايزين
بس نقدر نتحكم في رد فعلنا
نعرف امتى نقول لا وامتى نوافق
امتى نغضب وامتى منتأثرش
او زي ما قالت الحكمة اللي معرفش جنسيتها ولا اعرف صاحبها
" لا تدع احد يملأ كأسك " !

أيوة ..
احنا مش ورقة محطوطة ف مهب الريح تحركها زي ماهي عاوزة


خلينا نكون سنبلة تتمايل وتحركها الريح اه
بس متكسرهاش


رد فعلنا يكون طبيعي
يتأثر بالموقف اه
بس منأفورش


مش اي حاجة تكسرنا او توقعنا
احنا اقوى من اي حاجة ومن اي حد


والاهم
لازم نكون اقوى من نفسنا


اه
لان نفسنا اخطر من اي حاجة وكل حاجة
لو سبنا نفسنا لنفسنا
لو اتحكمت فينا
يبقى هتضيع وتضيعنا معاها
لازم نقود نفسنا مش هي اللي تقودنا


....................................


مش عارفة ليه بقول الكلام ده بالذات في الوقت ده بالذات
بس حسيت اني عايزة اقول كده
عايزة ابعت لنفسي الرسالة دي

ويارب
تكون الرسالة وصلت !

الخميس، أكتوبر 20، 2011

كلام صامت





بداخلي كثييييير من الكلام ...

لكني أعجز عن النطق ..

ولا أرغب في التحدث

...........

الجمعة، أكتوبر 07، 2011